#Юбиляры_ЧитающийБаймак
15:06 14.09.2023 16+
Быйыл арҙаҡлы яҡташыбыҙ, билдәле педагог һәм йәмәғәт эшмәкәре Азамат Тажетдиновтың тыуыуына 85 йыл тулған булыр ине.
Азамат Әғзәм улы 1938 йылда Баймаҡ районы Байым ауылында тыуған. Бала сағы Бөйөк Ватан һуғышы осорона тура килә. Атаһы һуғышҡа китә һәм 1943 йылдың 13 мартында Смоленск йүнәлешендәге һуғышта батырҙарса һәләк була. Ғаиләлә әсә ҡулында атайһыҙ алты бала ҡала. Азамат Әғзәм улына өлкәндәр менән бер рәттән ауырлыҡтарҙы күтәрергә, донъя мәшәҡәттәрен атҡарырға, колхозда бил бөгөргә тура килә. Шулай ҙа бала саҡтан күңелендә белемгә һөйөү йөрөткән малайға әсәһенең ҡеүәтләү һүҙҙәре дәрт өҫтәй. Башланғыс мәктәпте Байымда, ете класты Икенсе Этҡол мәктәбендә тамамлағас, уҡытыусы булыу теләге уны Темәс педагогия педучилищеһына алып килә. 1956 йылда Темәс педучилищеһы ябылыуы арҡаһында аҙаҡҡы курсты 1957 йылда Белоретта уҡып бөтә. Беренсе эш урыны Баймаҡ районы Байыш мәктәбе, артабан - Икенсе Этҡол мәктәбендә эшләй. 1965 йылда ситтән тороп Башҡорт дәүләт университетының филология факультетын тамамлай. 1965—1969 йылдарҙа Баймаҡ район мәғариф бүлегендә инспектор вазифаһын башҡара. 1969—1977 йылдарҙа Икенсе Этҡол урта мәктәбенең директоры булып эшләй. Тап Азамат Әғзәм улы директор вазифаһын башҡарған саҡта яңы, замана талаптарына яуап биргән мәктәп төҙөлә.
Хеҙмәт юлын мәғарифҡа бағышлаған шәхес тыуған яғының тарихын өйрәнеү ниәте менән яна. Хаҡлы ялға сыҡҡас та Азамат Әғзәм улы ныҡлап ижадҡа тотона. 2003 йылда йәнтөйәге булған ауылы тураһында “Беҙ – Байымдар” тигән тәүге китабын нәшер итә. Әйтергә кәрәк, китап ауылдаштары өсөн генә түгел, бәлки, район йәмәғәтселеге өсөн дә оло ваҡиға була. Сөнки ошоға тиклем районда үҙ төйәге тураһында белешмә сығарған кеше булманы. Икенсе Этҡолда төпләнгән кеше булараҡ, ауыл тарихын, уның шәхестәрен ентекләп өйрәнә, улар тураһында материалдар туплай башлай. Һөҙөмтәлә 2005 йылда “Ел-дауылдар аша” исемле күләмле китабы баҫылып сыға. Артабан инде өс һуғышты үҙ елкәһендә татыған, репрессия ҡорбаны булып, күп эҙәрлекләнеүҙәргә дусар ителгән Шәһәрғәзи Ғәбдиев тураһында, уның шиғырҙарын, бәйеттәрен, топонимикаға бәйле материалдарын туплап, 2005 йылда “Шәһәрғәзи сәсән” исемле китабын сығарыуға өлгәшә. Байым ауылы халҡы өсөн 2012 йылдың йәйендә үткәрелгән Байым ишандың тыуыуына 280 йыл тулыуына арналған тантаналар онотолмаҫлыҡ хәтирә булып ҡалды. А. Тажетдинов бик күп архив мәғлүмәттәргә эйә булып, халыҡҡа үҙ тарихын ҡайтарып бирҙе, аңын асты. Оло йәшенә ҡарамаҫтан Азамат Әғзәм улы үҙе лә, мәғрифәтсе Байым ишан кеүек, халыҡҡа белем таратты. Уның көсө менән Байым ишанға һәйкәл ҡуйылды.
Уның фиҙаҡәр хеҙмәте “РСФСР-ҙың мәғариф отличнигы”, “Башҡортостан Республикаһының атҡаҙанған мәҙәниәт хеҙмәткәре” исемдәре, СССР Мәғариф министрлығының Почет грамотаһы, “Хеҙмәт ветераны” миҙалы менән баһаланды, Батыр Вәлид исемендәге премия лауреаты булып танылды.
Шәхестең исемен мәңгелләштереү маҡсатында 2-се Этҡол мәктәбе бинаһына күренекле педагог, яҙыусы-тарихсы, мәктәпкә нигеҙ һалыусы Тажетдинов Азамат Әғзәм улына мемориаль таҡта ҡуйылған һәм мәктәпкә исеме бирелгән.
Һеҙҙең иғтибарға Тажетдинов Азамат Әғзәм улының тыуыуына 80 йыл тулыуына арнап китаптарына байҡау форматында төшөрөлгән “Рухи мираҫ” исемле фильм тәҡдим итәбеҙ (Авторы – Айгөл Иҙелбаева, 2018 йыл, Баймаҡ телевидениеһы).
Китаптары:
• «Беҙ - Байымдар» (2003);
• «Ел-дауылдар аша» (2005);
• «Шәһәрғәзе сәсән» (2005);
• «Ғүмерем ағыштары - ғаиләм яҙмыштары» (2008);
• «Сәсәндәр иленә сәйәхәт» (2009);
• «Күңелдәрҙә яра төҙәлмәгән» (2010);
• Оло юлда Юлык (2012);
• «Байым ишан нәҫелдәре» (2013)
Последние новости
Вниманию руководителей, специалистов по охране труда! О проведении тестирования по охране труда
ФГБУ Всероссийский научно-исследовательский институт
16 сентября 2025 года в 10:30 по московскому времени в рамках Х Всероссийской недели охраны труда проводится Всероссийское тестирование
