Рәшит Шәкүр йондоҙо
05:17 25.06.2024 16+
Рәшит Шәкүр йондоҙо
Рәшит ағай Шәкүров ысын донъяға күсте.
Шундайын ихлас, самими йылмайыуы күҙ алдында тик тора. Иң ауыр мәлдәрҙә лә ғазаптарын йотоп йылмая белде Рәшит ағай. Халҡыбыҙҙың фиҙаҡәр ҡаһарманы ине ул. Хәҙер шуны ла беләбеҙ: күгебеҙҙә тағы бер йондоҙ балҡый.
Йондоҙҙар кеүек ата-олаталарыбыҙ. Бәғзе йондоҙҙарҙың яҡтылығы, нурҙары меңәр-меңәр йылдар буйы ергә осоп килә тиҙәр. Ғәжәйеп күренеш: ул йондоҙҙар меңәр-меңәр йылдар элек янып юҡҡа сыҡҡан, әммә нурҙары һаман һүнмәгән, һаман осоп килеүен дауам итә, юлыбыҙҙы ғына түгел, рухыбыҙҙы ла яҡтырта.
Рәшит Шәкүрҙең түбәндәге шиғыр юлдары шундай уйҙарға һалды:
Меңәр йылдар буйы килә икән, тиҙәр
Алыҫ-алыҫ йондоҙҙарҙан яҡтылыҡ.
Ғәжәп итәм: бармы хәҙер, юҡмы улар,
Баш осонда әммә тора яҡтырып...
Халҡыбыҙ йәшәһә, Рәшит Шәкүр йондоҙо ла күгебеҙҙе яҡтыртып торасаҡ!
"Мең дә бер күҙәтеүем" яҙмаларынан
1002-се күҙәтеү